Ijtimoiy loyihalar boʻyicha oʻtkazilgan soʻrovda 7525 U-Report foydalanuvchisi ishtirok etdi. Soʻrovda koʻproq Toshkent shahri (13%), Farg'ona (12%) va Samarqand (10%) viloyatlaridan  respondentlar qatnashdilar. Sirdaryo, Navoiy va Jizzax viloyatlaridan esa kamroq respondentlar soʻrovda ishtirok etdilar (har bir viloyatdan 4%dan).

Respondentlarning 86%i 30 yoshgacha boʻlgan shaxslarni tashkil etdi. Ammo soʻrovda eng faol boʻlgan yosh qatlami bu – 20-29 yoshdagi respondentlar boʻlib, ular umumiy respondentlarning 59%ini tashkil etdi. 13-19 yoshdagi respondentlarning ulushi esa 27%ni tashkil etdi.

Sorov ishtirokchilarining deyarli yarmi (47%) OTM talabalari boʻldi. Byudjet tashkilotlari xodimlari respondentlarning 12%ini, maktab oʻquvchilari esa 10%ini tashkil qildi. Umuman olganda, barcha respondentlarning 33%i ishlaydigan yoki ish izlayotgan respondentlarga toʻgʻri keladi. Ayni shu guruhga biz, shuningdek,  "Boshqa" variantini tanlaganlarni ham qoʻshdik.

Soʻrov natijalariga koʻra, Yoshlar ishlari agentligining eng taniqli loyihasi – "Yosh kitobxon" tanlovi, uni 24% respondent bilishini ta’kidladi. Ushbu loyiha ayniqsa kichik yosh qatlami orasida koʻproq ma’lum, 13 yoshgacha boʻlgan respondentlarning 42%i va 13-18 yoshdagi respondentlarning 28%i  ushbu javob variantini tanladilar.

Faoliyat turiga koʻra, bu loyihani 30% maktab oʻquvchilari, 28% abituriyentlar va 26% litsey va kollej talabalari bilishadi.

Aksincha, Modul5 loyihasi yoshi kattaroq respondentlar orasida koʻproq mashhur. 13 yoshgacha boʻlgan respondentlar orasida hech kim bu loyihani bilmas ekan, 13-18 yoshdagi respondentlarning 7%i va 18 yoshdan katta respondentlarning 5%i ushbu loyihani bilishini ta’kidlagan. Bu loyihani qolganlarga qaraganda koʻproq bloggerlar va OAV xodimlari bilishdi (10%).

Shuningdek, bloggerlar va OAV xodimlarining 19%i sanab oʻtilgan agentlik loyihalarining barchasini bilishini ta’kidlagan.

Biroq, respondentlarning deyarli 1/3 qismi sanab oʻtilgan hech bir loyihani bilmasligini ta’kidladi. Ushbu koʻrsatkich hozirgi paytda ish bilan band boʻlganlar orasida ayniqsa yuqori. Hududlararo esa, Toshkent shahridagi respondentlarning 51%i agentlikning hech bir loyihasi haqida eshitmagan. "Yosh kitobxon" tanlovi Navoiy viloyatidagi respondentlarning 33%iga ma’lum va 7% Qoraqalpogʻiston Respublikasidagi respondentlar Modul5 loyihasi haqida bilimga ega, bu hududlar kesimidagi eng yuqori koʻrsatkichlardir.

Biz, shuningdek, respondentlardan ijtimoiy loyihalar uchun ustuvor boʻlgan yoʻnalishlarni bir nechtasini belgilashini soʻradik. Natijada 7525ta respondentga 10778ta javob toʻgʻri keldi.

Respondentlarning 62%i bugungi kunda ijtimoiy loyihalarni rivojlantirishning eng ustuvor yoʻnalishi –  Fan va ta’lim deb belgiladi. Bu yoʻnalishni rivojlantirishni koʻproq yoshi kattaroq boʻlgan va ayni chogʻda ish bilan ta’minlangan, xususan, xalqaro tashkilotlar va huquq-targ’ibot organlari xodimlari qoʻllab-quvvatlaydi.

Ijtimoiy loyihalarning boshqa muhim yoʻnalishlari qatorida – IT-texnologiyalar hamda tadbirkorlik va bandlik. Bu loyihalarning har biri 17% respondentlar uchun qiziqdir.

Respondentlarning yarmi (50%) volontyor sifatida ijtimoiy loyihalarda katta qiziqish bilan qatnashishga tayyor. Grafikdan koʻrinib turganidek, bunday loyihalarga maktab oʻquvchilari (59%) va kollej/litsey talabalari (57%) koʻproq qiziqish bildirmoqda.

Ish bilan band boʻlgan respondentlar ijtimoiy loyihalarda volontyorlik qilishga kamroq moyillik bildirdilar. Ularning aksariyati bu tanlovni vaqt yetishmasligi bilan izohlaydi.

Shuningdek, hozirda oʻqimayotgan va ishlamayotgan, hamda ish izlayotgan respondentlarga ham alohida e’tibor qaratish lozim. Chunki ularning 43%i katta ishtiyoq bilan volontyor boʻlishga tayyor. Ushbu toifadagi koʻplab respondentlar bunday loyihalarda ishtirok etish uchun moddiy ragʻbat boʻlgan taqdirdagina volontyorlik qilishga tayyorligini bildirdi.

Hududlar kesimida, Navoiy viloyatidagi respondentlarning 57%i, hamda Andijon va Namangan viloyatlaridagi respondentlarning 56%i katta qiziqish bilan volontyor boʻlishni istaydi. Eng past qiziqish darajasi Toshkent shahrida qayd qilindi – respondentlarining 43%igina bunday xohish borligini bildirgan. Boshqa hududlar bilan taqqoslaganda, poytaxtlik respondentlar koʻproq (23%) bu loyihalarda volontyorlik qilish uchun vaqtlari yoʻqligini ta’kidlab oʻtishgan.

Izoh: Soʻrovlar natijasida olingan maʼlumotlar UNICEFning fikrini aks ettirmaydi, reprezentativ maʼlumotlar hisoblanmaydi va ushbu U-Report so’rovida qatnashgan respondentlarning fikrini aks ettiradi.