Mulohazalar Hikoyalar Haqida Mashg'ullik Reports Hozir qo'shiling
U-Reportga qo'shiling, Sizning fikringiz muhimdir.
STORY
Davlat xizmatlarini koʻrsatish sifati qanday?

 

U-Report Oʻzbekiston Respublikasi Adliya vazirligi bilan hamkorlikda yoshlar orasida soʻrov oʻtkazdi.

 

Soʻrov maqsadi: davlat idoralari ishining sifatini oshirish uchun shaxslar murojaatlari bilan ishlash, davlat xizmatlarini ko’rsatish sifati bo'yicha yoshlar fikrini bilib olish.

 

Soʻrov geografiyasi: Oʻzbekistonning barcha viloyatlari

 

Respondentlar soni: 4856 U-Report foydalanuvchilari.

 

 

 

 

SOʻROVNING ASOSIY XULOSALARI:

1.      Soʻngi 2 yil ichida respondentlarning 16%i davlat xizmatlari markazlariga, 12%i pasport stollariga va 7%i xalq qabulxonalariga murojaat qilgan. 

2.      Respondentlarning 36%i davlat idorasiga murojaat qilganda davlat xizmatchilarining qoʻpolligiga duch kelgan. Mahalla qoʻmitalari (18%), hokimliklar (21%) va bandlikka ko'maklashish markazlari (16%) xodimlarining ishchi etikasi respondentlar tomonidan salbiy baholandi.  

3.       Soʻrov ishtirokchilarining 19%i davlat idoralariga murojaat qilganda shaxsan korrupsiyaga guvoh boʻlganliklarini ta’kidladi, 48%i esa bunday holatlarni uchratmaganligini bildirdi.

4.       44% respondentlar davlat idoralarining "ishonch telefonlari"dan foydalangan. Shulardan faqatgina 7%i uning ishlashiga hech qanday e'tirozi yo'qligini, 17%i telefon orqali ba’zan tushib boʻlmasligini va yana 8%i murojaatlariga toʻliq javob olmaganliklarini ta’kidladilar.

5.       Respondentlarning 30%i davlat muassasasiga qilgan murojaatlari 5 kungacha muddat ichida koʻrib chiqilganligini ta’kidladi. Respondentlar Davlat xizmatlari markazlarining xizmat koʻrsatish tezligini yuqori baholadilar.

6.       21% respondentlar davlat idoralariga qilgan murojaatlari yechimsiz qolganligidan shikoyat qildilar.  

7.       Respondentlarning 56%i murojaat qilingan davlat idoralari ishiga ijobiy baho berdi (shundan 10%i "a’lo" va 46%i "yaxshi"). Ayniqsa, davlat xizmatlari markazlari, pasport stollari va adliya idoralari yuqori bahoga sazovor boʻlishdi.

8.       Aksariyat respondentlar (64%) davlat organlari tomonidan murojaatlarni koʻrib chiqish muddatlarini qisqartirish kerak deb hisoblaydi va faqatgina 2% respondentlar bu muddat uzaytirilishi tarafdori.

9.       Respondentlarning yarmi (49%) davlat organlariga onlayn formatda va 20%i ogʻzaki va telefon orqali murojaat qilish tarafdori.

 


 

Soʻrovda 4856 U-Report foydalanuvchilari ishtirok etgan boʻlib, ularning 26%i soʻngi 2 yil ichida hech bir davlat idorasiga murojaat qilmagan. Soʻrov shartlariga koʻra ushbu toifadagi respondentlar faqat soʻngi 2ta savolga javob berishdi, chunki savollarning aksariyatiga javob berish uchun davlat idoralariga bevosita murojaat qilganlik tajribasi talab etiladi.


Respondentlarning 16%i aynan davlat xizmatlari markazlariga murojaat qilgan. Toshkent shahri, Surxondaryo va Namangan viloyatlaridagi respondentlarning 20%idan ortigʻi ushbu markazlarning xizmatlaridan foydalangan. Qoraqalpogʻiston Respublikasida 11% va Andijon viloyatida 12% respondentlar bu markazlarga murojaat qilishgan.

Soʻrov natijalariga koʻra, ayol respondentlar davlat idoralariga kamroq murojaat qilishgan. Ularning 33%i soʻngi 2 yil ichida hech qayerga murojaat qilmagan boʻlsa, yigitlar orasida bu koʻrsatkich 22%ni tashkil etdi. Shuningdek, 19% yigitlarga qaraganda, qizlarning faqatgina 11%i davlat xizmatlari markazlariga  murojaat qilishgan.


Respondentlarning 36%i davlat xizmatchilarining qoʻpol munosabatiga duch kelgan. Iste’molchilar huquqlarini himoya qilish agentligiga murojaat qilgan respondentlarning 26%i bu tashkilot xodimlari ularga nisbatan qoʻpol munosabatda boʻlganini qayd etdi. Shuningdek, mahalla qoʻmitalari (18%), hokimliklar (21%) va bandlikka koʻmaklashish markazlari (16%) xodimlarining ishchi etikasi ham salbiy baholandi.

Davlat xizmatlari markazlari xodimlarining mehnat odobi eng yuqori baholandi. Respondentlarning deyarli yarmi bu markazlarning xodimlari doimo rasmiy moumalada bo’lganligini ta’kidladi. Ushbu muassasalarga murojaat qilgan respondentlarning faqat 24%igina bu muassasa xodimlarning qoʻpolligiga duch kelgan.

Ombudsmanga murojaat qilganlarning 31%i bu institutga murojaat qilganda xushmuomalalik bilan javob olganliklarini ta’kidladi. Ammo shuni aytish kerak, ushbu institutga faqatgina 16 nafar respondent murojaat qilgan va ularning javoblari foizlarda katta qiymatlarni beradi, bu esa asl holatni aks ettirmasligi mumkin. Shuning uchun quyida ushbu tahlilda biz Ombudsman bo’yicha olingan ma'lumotlarga alohida to'xtalmaymiz.


Respondentlarning deyarli yarmi (48%) davlat idoralariga murojaat qilganda korrupsiyaga duch kelmaganliklarini ta’kidladi. Ushbu variantni tanlagan respondentlarning ulushi, ayniqsa, davlat xizmatlari markazlariga murojaat qilganlar orasida yuqori (63%).

Iste’molchilar huquqlarini himoya qilish agentligiga murojaat qilgan respondentlarning 30%i shaxsan korrupsiyaga duch kelgan. Shuningdek, mahalla qoʻmitalari va bandlikka koʻmaklashish markazlariga murojaat qilgan respondentlarning 24%i shaxsan oʻzlari korrupsiya guvohi boʻlishgan.

Hududlar kesimida, Andijon, Qashqadaryo va Samarqand viloyatlaridagi respondentlarning aksariyati oʻzlari yoki tanishlari davlat organlariga murojaat qilganida korrupsiya holatlariga duch kelishgan (oʻrtacha har bir viloyatda 46%dan). Jizzax va Toshkent viloyatlarida, shuningdek Qoraqalpog'iston Respublikasi esa bunday holatlarni uchratgan respondentlar ulushi nisbatan kamroq (oʻrtacha har bir hududda 37%dan).

 

Soʻrov ishtirokchilarining 44%i ishonch telefonlari” orqali davlat idoralariga murojaat qilishgan. Ayniqsa, vazirliklarga ishonch telefonlari” orqali murojaat qilgan respondentlar ulushi yuqori (74%).

14% respondentlar "ishonch telefonlari" orqali davlat idoralari bilan bogʻlanish imkoniyati mavjudligidan bexabar boʻlgan. Pasport stoliga murojaat qilganlarning 29%igina ishonch telefonlariga qoʻngʻiroq qilishgan. Aynan ushbu respondentlarning yarmi telefon orqali murojaat qilishga ehtiyoj boʻlmaganligini bildirdi.

Soʻrovning hududiy tahlillariga koʻra, poytaxtlik respondentlarning 50%dan ortigʻi davlat idoralarining "ishonch telefonlari"dan foydalanganlar, Navoiy viloyatidagi respondentlarning esa faqat 35%i bu aloqa kanalidan foydalangan.


Davlat xizmatlari markazlariga murojaat qilgan respondentlar bu muassasalarning tezkorligini e’tirof etdilar, respondentlarning 54%idan ortigʻining murojaati 1-5 kun ichida koʻrib chiqilgan. Shuningdek, masalaning tezkorlik bilan 1-5 kun ichida hal qilinishi adliya organlari (40%) va soliq idoralarida (32%) ham qayd etildi.

Respondentlarning hal qilinmagan murojaatlarining eng yuqori ulushi (respondentlarning 47%i) Bandlikka koʻmaklashish markazlariga toʻgʻri kelgan. Shuningdek, hokimiyatlar (40%), Iste’molchilar huquqlarini himoya qilish agentligi (36%) va mahalla qoʻmitalariga (31%) murojaat qilgan koʻplab respondentlarning masalalari ham oʻz yechimini topmagan.

Namangan viloyatidagi respondentlarning 37%i ularning murojaatlari dastlabki 5 kun ichida koʻrib chiqilganligini ta’kidlagan boʻlsa, Andijon, Jizzax va Toshkent viloyatlarida bu koʻrsatkich 27%ni tashkil etadi.

Jizzax viloyatidagi respondentlarning 32%i ularning masalasi hal boʻlmaganligini ta’kidlagan.

 

Davlat xizmatlari markazlari (75%), pasport stollari (74%) va adliya idoralari (66%) kabi tashkilotlarning xizmat koʻrsatish sifati respondentlar tomonidan ijobiy baholandi.

Hokimiyatlarga murojaat qilgan respondentlarning 60%i xizmat koʻrsatish sifatini salbiy baholadi. Shuningdek, Iste’molchilar huquqlarini himoya qilish agentligi (58%), Bandlikka koʻmaklashish markazlari (57%) va Prezident ma’muriyatining (54%) xizmat sifati ham respondentlar tomonidan salbiy baholandi.

Hududlar kesimida Navoiy, Namangan, Fargʻona va Xorazm viloyatlaridagi respondentlar davlat idoralarining ishidan koʻproq qoniqish hosil qilganlar, oʻrta hisobda bu viloyatlardagi 60% respondentlar ularning xizmatlariga ijobiy baho berishgan. Andijon, Jizzax va Toshkent viloyatlaridagi davlat idoralari xizmatlari esa, aksincha, koʻproq salbiy baholandilar (o'rtacha 45%).


Respondentlarning aksariyati (64%) davlat organlari tomonidan murojaatlarni koʻrib chiqish muddatlari qisqartirilishi zarurligini takidlagan boʻlsa, bu muddatlarning uzaytirilishini 2% respondentlar qoʻllab-quvvatladi. Murojaatlari 2 oydan koʻp vaqt davomida koʻrib chiqilgan respondentlarning 72%i va 15 kungacha muddat ichida murojaati koʻrib chiqilgan respondentlarning 62%i bu muddatning qisqartirish muhimligini aytib oʻtgan.

Amaldagi koʻrib chiqish muddatlari Qoraqalpogʻistonlik respondentlarning 37%ini va Andijonlik respondentlarning 26%ini qanoatlantiradi.


Respondentlarning yarmi elektron shaklda davlat idoralariga murojaat qilishni qulayroq deb biladi. Yigitlar ushbu yoʻl orqali murojaat qilishni koʻproq afzal koʻrishadi: ularning 55%i ushbu variantni tanlagan boʻlsa, qizlar orasida bu koʻrsatkich 38%ni tashkil etdi. Qizlar yigitlarga nisbatan koʻproq davlat idorasiga borgan holda murojaat qilishni afzal koʻrishadi (qizlarning 27%i, yigitlarning 14%i).

Hududlar orasida Toshkent shahrida respondentlarning 58%i elektron shaklda murojaat qilishni afzal topgan boʻlsa, Qoraqalpogʻiston Respublikasida bunday respondentlar ulushi 40%ni tashkil qildi.

Respublikaning boshqa hududlari bilan taqqoslaganda Qoraqalpogʻistonlik respondentlar koʻproq davlat idorasiga tashrif buyurgan holda murojaat qilishni ma’qullaydilar (29%). Yozma murojaatlar Namangan va Samarqand viloyatlaridagi respondentlar orasida birmuncha ommaboproq (har bir viloyatda 14%dan).

 

Izoh: Soʻrovlar natijasida olingan maʼlumotlar UNICEFning fikrini aks ettirmaydi, reprezentativ maʼlumotlar hisoblanmaydi va ushbu U-Report sorovida qatnashgan respondentlarning fikrini aks ettiradi.

 

Ijobiy ijtimoiy o'zgarishlarga erishishda yoshlarning fikrlarini qanday qo'llayotganimizni raqamlarda ko'ring.
MASHG'ULLIK BAYONI
UNICEF logo